B i o g r a f i a
Suenter la matura da musica al gimnasi claustral a Mustér studegia Quirina lungatgs all’universitad ad Antwerpen en Belgia. Parallel leutier entscheiva ella al conservatori roial Antwerpen il studi da cant classic. Suenter siu master en litteratura englesa ed il certificat da scolasta retuorna ella Grischun, dat scola e sededichescha al cant.
"Senza musica fuss il mund in err." (F. Nietzsche)
Quirina ha entschiet a sunar clavazin e cantar ed ha mai calau. Suender siu studi da lungatgs ed haver constatau ch'igl aforissem da H. C. Andersen, "nua che plaids carpan, tschontscha la musica", ei vers, ha ella sedecidiu da sededicar a sia pissiun.
Quirina cooperescha cun differentas cantaduras d’opera e cun differents scolasts sco Sumi Jo, KS Eva Randová, Jenny Drivala, Anne Williams-King, Nuccia Focile, Inessa Galante, Francesca Patané ed auters.
Dapi 2018 sepresenta ella regularmein sin tribuna cun las rollas da Virtù e Damigella en «L’incoronazione di Poppea» da Monteverdi (Hellenic Opera Corporation, Thessaloniki), Despina en «Cosí fan tutte» da Mozart (EMA, Teplice, 2. occupaziun).
Ella producescha, meina reschia e gioga en «Musik-Pick-Nick», in agen teater musical cun artist e partenari Gianin Conrad, pil qual ella retscheiva il premi «projects pigns» dil Cantun grischun.
2019 registrescha Quirina ina disc cumpact cun arias da Mozart ch’ella translatescha per romontsch a post pigl onn giubilar da «100 onns Lia Rumantscha».
Il medem onn san ins veser ed udir Quirina ella rolla dall’Adele en «die Fledermaus» da Johann Strauss (Clyde Opera Group, Glasgow, Scozia) e quei per engles. Cun la rolla da Flavia Brent/Belinda Blair en «Der nackte Wahnsinn» da Michael Frayn debutescha ella al teater.
2020 surpren ella la rolla dalla druida el giug festiv «Il grep e la spada - der Fels und das Schwert», planisaus per la reavertura dalla baselgia restaurada sogn Martin dalla claustra Mustér. In giug screts ed inscenaus da Gschwend eVöllinger. Dus dis avon la premiera vegn muort las restricziuns da corona tut sclaus. Era siu secund project, il teater musical «Dinner for a Diva», vegn buca presentaus sin tribuna mobein la finala filmaus. Questa premiera ei planisada per la fin december 2022.
2021 conta Quirina la Regina dalla notg en «die Zauberflöte» da Mozart a Teplice en Tschechia.
2022 surpren ella la rolla dalla Violetta Valéry en «La Traviata» da Verdi a Rhosllanerchrugog (North Wales Opera & Studio) e Glasgow (Clyde Opera Group) e gioga la rolla da Regula Willi el niev teater da Felix Benesch.
2023 era siu debut alla Carnegie Hall a New York e ha ella produziu sco era cantau ella premiera mundiala da «Ende Gelände», ina opera da camera con trax componiu da Milica Ilić .
Quirina ha luvrau cun differentAs cantadurAs e coaches: KS Eva Randová, Sumi Jo, Mignon Dunn, Luciana Serra, Jenny Drivala, Angel Joy Blue, Petra Lang, Anne Williams-King, Nuccia Focile, Inessa Galante, Francesca Patané, Stephanie Friede, Eva Oltivanyi, John Norris, Nimrod D. Pfeffer, Donald Wages, Irina Meachem and Adrian Baianu.
Quirina ei co-inizianta dil label experimental numnaus Salon Bruch Stein che colligia musica, art e teater in cun l’auter. Ord quei experiment nescha ina collaboraziun cun divers artists ed artistas che meina ad interessantas performanzas. Ina da quellas collaboraziuns ha liug cun siu partenari ed artist Gianin Conrad. Quirina planisescha e realiseschaperformanzas ellas exposiziuns da Gianin sco p.ex. el Kunstraum Engländerbau a Vaduz (2019), ella Kunsthalle Wil(2019), ella Shedhalle a Frauenfeld (2019) ed ella galleria Base Alpha ad Antwerpen (2021).
Quirina e Gianin scaffeschan 2020 «das Ding mit der Schönheit» ina installaziun d’art che consista d’ina plastica, d’ina projecziun da video e registraziun da sound sco era d’ina performanza per igl «Intra Muros Kunstfestival» a Winterthur.
2021 arvan els las portas d’art e musica alla Scala Trun ellas localitads dall’anteriura fabrica da ponn a Trun, nua che exposiziuns, concerts, discussiuns e projects han liug en successiun libra.
