B i o g r a f i a

Suenter la matura da musica al gimnasi claustral a Mustér ei Quirina ida en Belgia per studier lungatgs, pli exact engles, tudestg e flam, all'universitad dad Antwerpen. Lu ha ell'era entschiet in studi da cant classic al conservatori royal ad Antwerpen. Suenter sia MA en literatura englesa e l'educaziun sco instructura, ei Quirina turnada a Mustér ed ha entschiet a dar scola - surtut lungatgs - en differents loghens. 

Finalmein ha ella sedezidiu da dedicar siu temps all'art e ha priu part a cuors da meisters che han manau ella tier Jenny Drivala e suenter tier Anne Williams-King. Quirina ha era entschiet ad organisar differents projects e concerts, tgei che porta l'experientscha necessaria sco era si'amur da musica al publicum.

"Senza musica fuss il mund in err." (F. Nietzsche)
Quirina ha entschiet a sunar clavazin e cantar ed ha mai calau. Suender siu studi da lungatgs ed haver constatau ch'igl aforissem da H. C. Andersen, "nua che plaids carpan, tschontscha la musica", ei vers, ha ella sedecidiu da sededicar a sia pissiun.

Dapi 2018 ei Quirina pli e pli bia sin tribuna d'opera e teater: Virtù e Damigella,  «L’incoronazione di Poppea», Monteverdi (Hellenic Opera Corporation, Thessaloniki); Despina, «Cosí fan tutte», Mozart (EMA, Teplice);  Adele, «die Fledermaus»,  Johann Strauss (Clyde Opera Group, Glasgow); Flavia Brent/Belinda Blair (teater), «der nackte Wahnsinn», Michael Frayn. 2020 era la rolla da druida en «il grep e la spada» da Gschwend e Völlinger planisada. Pervia da corona stueva quei vegnir stuschau. 

 

Atgnas producziuns ein:  «Musik-Pick-Nick», teater musical egl uaul (prezi «kleine Projekte» dil cantun Grischun);  «Mit Mozart», arias da Mozart per Romontsch; «Dinner for a Diva», teater musical ella Postremise a Cuera. Filmau pervia da Corona.

Quirina ha luvrau cun differents cantadur(a)s e scholast(a)s: Sumi Jo, Jenny Drivala, Nuccia Focile, Inessa Galante, Eva Randová, Manolis Papasifakis, Francesca Patané, Anja Launhardt, Stephanie Friede, Eva Oltivanyi e John Norris.

Avon d'entscheiver cun cant ha ella sunau clavazin ed orgla. Clavazin ha ella priu uras gia cun sis. 

Quirina ei initianta da Salon Bruch Stein, in label experimental che cumbinescha art, musica e teater. Entras quei experiment ha la collaboraziun artists entschiet che ha manau tier interessantas performances.  Ina da quellas ei cun Gianin Conrad: Performance all'exposiziun «nur ein Ozean aus Impulsen» (2019) egl Kunstraum Engländerbau a Vaduz, ed all'exposiziun «KartonAge» (2019) ella Shedhalle a Frauenfeld. El November 2020 han els aunc inagada luvrau ensemmen;  «das Ding mit der Schönheit» ina installaziun d'art ord  ina plastica, ina projecziun da video, in'enregistraziun da sound ed ina performance per igl «Intra Muros Kunstfestival» a Winterthur.

Entschatta matg 2021 han Quirina e Gianin Conrad aviert il liug d'art e musica «Scala Trun» a Trun, nua ch'exposiziuns, concerts, discuors e projects vegnan ad anflar lur plaz.